2024-cü ildə Azərbaycanda 19 nəfər həbsxanadan qaçıb

Dövlət Statistika Komitəsinin (DSK) 2024-cü ilin statistik rəqəmləri ilə bağlı yaydığı məlumatda maraqlı bir məqam diqqət çəkib.

AJMEDİA xəbər verir ki, ötən il Azərbaycanda cəzaçəkmə müəssisələrindən ümumilikdə 19 nəfər qaçıb.

Bu rəqəm 2023-cü ilə nisbətdə azalıb. Belə ki, 2023-cü ildə cəzaçəkmə müəssisələrindən 29 nəfər qaçmışdı.

Azərbaycanda dustaqların qaçması ilə bağlı ən yadda qalan hadisə isə “Qoca” ləqəbli Etibar Məmmədovun Əli Ağami ilə birlikdə etap zamanı vaqondan qaçması idi. 2017-ci ildə baş verən həmin hadisədə “Qoca”ya sevgilisi, müğənni Fədayə Laçın kömək etmişdi.

Əməliyyat zamanı “Qoca” polislərlə silahlı müqavimət göstərən zaman zərərsizləşdirilmişdi.

Fədayə Laçın isə məsuliyyətə cəlb olunaraq həbs edilmiş, cəzası bitdikdən sonra azadlığa buraxılmışdı.

Əli Ağami isə 20 illik cəzasını çəkmək üçün həbsxanaya göndərilmişdi.

Xatırladaq ki, bu hadisəyə görə Penitensiar Xidmətin vəzifəli şəxsləri də həbs edilmişdi.//musavat.com