“Aciz və bacarıqsız” – Özbəkistandan Rusiyaya ağır ittiham

Özbəkistan parlamentinin üzvü Rusiyada səslənən son açıqlamalara kəskin reaksiya verib.

AJMEDİA.NEWS xəbər verir ki, Özbəkistan Ali Məclisinin deputatı və Milli Tiklaniş (Milli Dirçəliş) Partiyasının lideri Əlişir Kadırov Rusiya mediasında, xüsusilə də Kremlin təbliğatçısı kimi tanınan Vladimir Solovyovun çıxışlarını sərt şəkildə tənqid edib.

Kadırov bildirib ki, rus şovinist dairələrinin aqressiv və təhqiramiz ritorikası yeni məsələ deyil və bu cür yanaşma iki ölkə arasında mövcud olan hərtərəfli strateji tərəfdaşlıq və müttəfiqlik münasibətlərinə ciddi zərbə vurur. Onun sözlərinə görə, Rusiya mediasında ard-arda səslənən bu tip açıqlamalar təkcə diplomatik etikaya zidd deyil, həm də münasibətləri dağıdıcı məcraya sürükləyir.

Özbək deputat Solovyovun mövqeyinə toxunaraq vurğulayıb ki, nəticəsiz və məsuliyyətsiz bəyanatlar müəllifinin acizliyini və siyasi baxımdan nə qədər bacarıqsız olduğunu açıq şəkildə ortaya qoyur. Kadırovun fikrincə, bu cür ritorika Moskvanın Orta Asiyadakı mövqelərini zəiflədən əsas amillərdən birinə çevrilir.

Özbəkistandan səslənən bu sərt açıqlama postsovet məkanında Rusiyanın media dili və təzyiq siyasətinə qarşı artan narazılığın daha bir açıq göstəricisidir. Region ölkələri artıq təhqir və hədə ritorikasını müttəfiqlik münasibətləri ilə uzlaşan davranış kimi qəbul etmirlər.