Bu işçilərə 80 manat veriləcək

Azərbaycanda bayram və istirahət günlərində işləyənlərə əməkhaqqı ikiqat ödənilir.

AJMEDIA.NEWS-un məlumatına görə, Əmək Məcəlləsinin 164-cü maddəsinə əsasən, bayram günlərində işə cəlb olunma ümumilikdə qadağandır və yalnız müstəsna hallarda mümkündür. Hamilə qadınlar, azyaşlı uşağı olan analar və 18 yaşdan kiçik şəxslər isə bu günlərdə işlədilə bilməz.

Əməkhaqqının hesablanması iş sistemindən asılıdır:

Yəni vaxtamuzd sistemdə işləyənlərə bayram günü üçün saatlıq və ya gündəlik tarifin iki misli ödənilir. İşəmuzd sistemdə hər görülən iş və ya məhsul üçün ikiqat qiymət tətbiq olunur. Aylıq maaş alan işçilərdə isə norma daxilində işlədikdə əlavə birgünlük maaş, normadan artıq olduqda isə ikiqat gündəlik maaş ödənilir.

Məsələn, aylıq maaşı 800 manat olan işçi bayram günü işlədikdə, normal halda əlavə 40 manat, normadan artıq işlədikdə isə 80 manat alır. Saatlıq 5 manat alan işçi isə 8 saat işlədikdə 80 manat qazanır.

Qeyd edək ki, işçinin razılığı ilə ikiqat ödəniş əvəzinə əlavə istirahət günü də verilə bilər.