Cənab Cəfərov nəyi unudur?

“Kəpəz” bu ölkənin ən qalmaqallı klublarından biri, bəlkə də birincisidir. İllər keçir, dövran dəyişir, amma Gəncə təmsilçisinin ətrafında söz-söhbətlər səngimir. Bu qalmaqallar da daha çox “yorğan davası”nı xatırladır. Heç də bütün tərəflər Gəncə futbolunun inkişafını, “Kəpəz”in əvvəlki gücünün bərpasını arzulamır. Əsas dava-dalaş “klubda mən söz sahibi olum, ayrılan pullara mən nəzarət edim prinsiplərinin üstündə olur.

90-cı illərin ortalarında “Kəpəz” Azərbaycan çempionatında əməlli-başlı söz sahibi idi. “Sarı-göylər” ardıcıl ölkə çempionatının qalibi olurdu. Heç kim “Kəpəz”in yetirmələrinin, Gəncədə yetişən futbolçuların Azərbaycan futbolundakı əhəmiyyətini azalda bilməz. Hamımız arzulayırıq ki, “Kəpəz” yenidən əvvəlki gücünü bərpa etsin, klubun uşaq akademiyasından çıxan gəncəli istedadlar ölkə futboluna fayda versinlər. Gəncəli futbolsevərlər indi ötən günləri acı xiffət hissi ilə xatırlayırlar.

Uzun müddət “Kəpəz” infrastrukturun yoxluğundan, stadionun qəzalı vəziyyətdə olmasından, sponsorsuzluqdan əziyyət çəkib. Elə bunun da nəticəsidir ki, “sarı-göylər” çempionatın dəyişməz autsayderinə çevrilib. İndi vəziyyət nisbətən sabitləşib. Gəncə şəhər stadionu təmir edilib, yaza doğru komandanın doğma şəhərdə azarkeşlərin qarşısına çıxması planlaşdırılır. Sponsor məsələsi də həll edilib, komandanın indi sabit maliyyə dayaqları var. Azər Bağırovun baş məşqçi postuna gətirilməsi də doğru addımdır. “Qarabağ” üzərində qələbə qazanmaqla hamını təəccübləndirən “Kəpəz” 22-ci tur ərəfəsində “Karvan-Yevlax”ı 7 xal qabaqlayır, demək olar ki, azı 11-ci pilləni təmin edilib. Deməli, gələcəyə kövrək də olsa, optimist nəzərlərlə baxmaq, işıqlı planlar qurmaq olar.

Təəssüflər olsun ki, komanda yenə də intiriqalara çəkilir, “Kəpəz”in adı ətrafında yeni söz-söhbət yaradılır. Bu dəfə bu xoşagəlməz kampaniyaya Gəncəni Milli Məclisdə təmsil edən deputat Müşfiq Cəfərov da qoşulub. Cənab Cəfərov həmkarlarımızdna birinin açıqlamasına istinad edərək klubda yeyinti olduğuna işarə vurur, qazonun saxlanması üçün “Agrosport”un rəhbəri Fərman Əlizadəyə artıq pul ödəndiyini iddia edir. Bu iddianı dövriyyəyə buraxan həmkarımız artıq həqiqəti aşkara çıxardığını, məsələnin heç də belə olmadığını sənədlərlə istablayıb. Təəssüflər olsun ki, hörmətli Müşfiq müəllim təsdiqini tapmayan iddia ilə “Kəpəz”in rəhbərliyini ittiham edir. Belə çıxır ki, “Kəpəz”in idarə heyətindən kənarda qalan Cəfərov “mən də varam” həvəsiylə klub rəhbərliyinə savaş açmaq fikrinə düşüb? İnanmaq istəməsək də, gedişat onu göstərir.

Bu yerdə cənab Cəfərova iki məqamı xatırlatmaq istəyirəm. “Kəpəz”də böyük yeyintilər onun idarə heyətində yer aldığı dövrə təsadüf etmişdi. Məlum olmuşdu ki, AFFA tərəfindən Gəncə futbolunun inkişafı üçün ayrılan pullar müəyyən adamların bank kartlarına vurulub, sonra da nəğdləşdirilib. Bu barədə “Kəpəz”in o vaxtı mühasibi də etiraflar etmişdi. Həmin vaxt Müşfiq müəllim həqiqətin üzə çıxarılması, klubun pullarının geri qaytarılması üçün hansı addımları atdı, etiraz səsini ucaltdımı? Biz həmin hadisələri yaxşı xatırlayırıq. İkinci məqamı isə hörmətli deputatın iki il əvvəl “Kəpəz”in rəsmi saytına verdiyi müsahibəsində görürük. Sitat: “İş adamlarına səslənirəm ki, “Kəpəz”i tək qoymasınlar. Bu klub hər birimiz üçün doğmadır. 2016-cı ildə avroliqaya vəsiqə qazananda hamımız çox sevindik. İndi də eyni hisləri yaşamaq üçün çalışmalıyıq. Bunun üçün kluba sponsor lazımdır. İstəyirik ki, bu yolda iş adamları dəstəklərini əsirgəməsinlər. Bu yöndə hər hansı bir təkliflə çıxış etmək istəyən şəxslər varsa, onlarla görüşməyə hazırıq. Gəlsinlər, bir yerdə müzakirə edək, təklifləri dinləyək. Biz tərəfdən nə lazımdısa, etməyə hazırıq”.

Buyurun, cənab Cəfərov. İş adamları gəlib, “Kəpəz”i dirçəltməyə çalışırlar. Mövsümün yarısında onlara hücum etməyin nə adı var? Səhvlər hamı da olur, elə Cəfərovun təmsil olunduğu idarəçilərdə də var idi. Bəlkə imkan verək, bir vaxtlar köməyə çağırdığınız iş adamları mövsümün sonuna qədər qalsınlar, görək nə bacarırlar?!

Amal Abuşov