Donald Trampdan Viktor Orbanın məğlubiyyətinə İLK REAKİSYA
15 Aprel 2026 13:13 | Baxış sayı: 466
ABŞ Prezidenti Donald Tramp aprelin 12-də keçirilən seçkisində Macarıstanın sabiq baş naziri Viktor Orbanın məğlub olmasından narahatlıq keçirmədiyini açıqlayıb.
AJMEDIA.NEWS xəbər verir ki, Ağ Ev lideri bu barədə "ABC News" telekanalının jurnalisti Conatan Karla verdiyi müsahibədə qeyd edib. ABŞ prezidentinin sözlərinə görə, Macarıstanın gələcək hökumət başçısı olan "Tisa" partiyasının lideri Peter Madyar onun xoşuna gəlir. O vurğulayıb ki, Madyar əvvəllər Orbanın "Fides" partiyasının üzvü olub və miqrasiya məsələlərində oxşar mövqeyi bölüşür.
"Düşünürəm ki, yeni baş nazir öz vəzifələrini uğurla yerinə yetirəcək. O, yaxşı insandır. Zənnimcə, Madyar yaxşı baş nazir olacaq", - deyə D.Tramp əlavə edib.
ABŞ prezidenti əlavə edib ki, seçkidən bir neçə gün əvvəl Budapeştə səfər edən vitse-prezidenti Cey Di Vensin əvəzinə Macarıstana şəxsən gedərək Orban üçün təbliğat aparsaydı, bunun nəyisə dəyişib-dəyişməyəcəyi ilə bağlı dəqiq fikir söyləyə bilməz.
"O (Orban), xeyli geridə qalırdı. Mən bu prosesə o qədər də fəal cəlb olunmamışdım. Baxmayaraq ki, Viktor yaxşı adamdır", - deyə dövlət başçısı vurğulayıb.
Qeyd olunur ki, bu, faktiki olaraq Trampın parlament seçkisində Orbanın məğlubiyyətinə verdiyi ilk reaksiya olub.
Xatırladaq ki, Macarıstanda keçirilən səsvermədən iki gün öncə ABŞ Prezidenti Donald Tramp macarları birbaşa V.Orbana səs verməyə çağırmışdı, çünki onu "əsl dost" adlandırmışdı.
