Ehtiram Hüseynovun Xankəndidə konserti keçirildi

Qarabağ Universitetinin İncəsənət fakültəsində 9 aprel tarixində sinif konserti təşkil olunub.

AJMEDİA xəbər verir ki, konsertdə Əməkdar artist Ehtiram Hüseynov tələbələri ilə birlikdə çıxış edərək müxtəlif musiqi nömrələri təqdim edib.

Gənc ifaçılar klassik və müasir əsərləri səsləndirərək öz bacarıqlarını nümayiş etdiriblər.

Konsert proqramında tələbələri fakültənin müəllimləri – Əməkdar artist Kamran Kərimov (nağara), Nurlan Cəbizadə (tar) və Elvin Novruzov (kamança) müşayiət ediblər.

Tədbir iştirakçıları tərəfindən maraqla qarşılanan konsert səmimi və yaradıcı atmosferi ilə yadda qalıb. Bildirilib ki, bu cür tədbirlər tələbələrin səhnə təcrübəsinin artırılması və peşəkar inkişafı baxımından mühüm əhəmiyyət daşıyır.

Qeyd edək ki, İncəsənət fakültəsində mütəmadi olaraq təşkil olunan belə konsert proqramları gənc istedadların üzə çıxarılmasına və mədəni mühitin inkişafına töhfə verir.//mocomment.az