“Epşteyn işi” ilə bağlı yeni fotolar yayıldı – Aralarında Bill Qeyts də var…

ABŞ Konqresinin Nümayəndələr Palatasının Tənzimləmə və İctimai Məsuliyyət Komitəsi maliyyəçi Cefri Epşteyn aid daha 68 yeni fotoşəkili ictimaiyyətə təqdim edib.
AJMEDIA xəbər verir ki, yeni materiallar Cefri Epşteynin siyasi, texnologiya və media dairələrində tanınmış şəxslərlə geniş əlaqələrini bir daha gündəmə gətirib.

Fotolarda “Microsoft”un həmtəsisçisi Bill Qeyts, “Google”un həmtəsisçisi Sergey Brin, “The New York Times” qəzetinin köşə yazarı Devid Bruks, kinorejissor Vudi Allen, filosof və dilçi Noam Çomski, eləcə də siyasətçi Stiv Bennon kimi tanınmış simalar yer alır.

Şəkillər Cefri Epşteynin müxtəlif sosial və ictimai tədbirlərdə bu şəxslərlə birlikdə göründüyünü əks etdirir. Bununla belə, fotoların açıqlanması həmin şəxslərin hər hansı qanunsuz fəaliyyətdə iştirak etdiyini sübut etmir və Konqres də bunu xüsusi vurğulayır. Açıqlanan materiallar arasında yalnız tanınmış simalarla çəkilmiş şəkillər deyil, həmçinin “Lolita” romanına istinadlar olan qeydlər, qadın bədənlərinin yaxın plan görüntüləri, pasport surətləri və bəzi mesaj yazışmalarının ekran şəkilləri də mövcuddur ki, bu da ictimaiyyətdə ciddi narahatlıq doğurub.

Bu açıqlamalar ABŞ-də qəbul edilmiş “Epşteyn sənədlərinin şəffaflığı haqqında” qanun çərçivəsində həyata keçirilir. Qanuna əsasən, Ədliyyə Nazirliyi aktiv istintaqa və ya milli təhlükəsizliyə zərər vura biləcək hallar istisna olmaqla, “Epşteyn” işi ilə bağlı bütün qeyri-məxfi materialları ictimaiyyətə açıqlamalıdır. Şəkillərdə adı hallanan şəxslərin bəziləri daha əvvəl Cefri Epşteynlə təmaslarını etiraf edərək bunu səhv qərar adlandırıb. Məsələn, Bill Qeyts bu əlaqələrin əsasən xeyriyyə və filantropik məqsədlərlə bağlı olduğunu bildirmişdi.

Qeyd edək ki, Cefri Epşteyn 6 iyul 2019-cu ildə Nyu-York ştatının hüquq-mühafizə orqanları tərəfindən həbs edilib. Prokurorlar onun Manhettendəki evinə 2002-2005-ci illərdə ən kiçiyi 14 yaşında olan onlarla azyaşlı qız üçün məşhurların və zənginlərin səfərlər təşkil etdiyinə dair sübutların olduğunu bildiriblər. Epşteynin qonaqları arasında təkcə ABŞ-də deyil, həm də bir çox başqa ölkələrdə çoxlu sayda hazırkı və təqaüddə olan məmurlar, o cümlədən keçmiş dövlət başçıları, iri sahibkarlar və şou-biznes ulduzları olub. Epşteynin cinayət təqibi 2019-cu il avqustun 10-da həbsxana kamerasında intihar etdikdən sonra dayandırılıb.//yeniavaz.com