Gürcüstandan gətirilən avtomobillər bahalana bilər – Rüsumlar qaldırılır

Gürcüstanın Daxili İşlər Nazirliyinin Xidmət Agentliyi tranzitlə ölkədən keçən və ya xarici vətəndaşlar tərəfindən alınıb ixrac və ya re-ixrac üçün nəzərdə tutulan avtomobillərlə bağlı bir sıra xidmətlərin tariflərini artırmağa hazırlaşır.
AJMEDİA Gürcüstan mətbuatına istinadən xəbər verir ki, qanun layihəsi Parlamentin müzakirəsinə təqdim edilib.

Layihəyə əsasən, dəyişikliklər yalnız Gürcüstan ərazisindən tranzitlə keçərək xarici ölkələrə yollanan nəqliyyat vasitələrinin və xarici vətəndaşlar tərəfindən ölkədə alınıb ixrac üçün nəzərdə tutulan avtomobillərin qeydiyyat prosedurlarına şamil edilir.

Tranzit nömrə nişanlarının verilməsi mövcud 50 lari (32 manat) əvəzinə 370 lari (233 manat) olacaq.

Ekspertiza və müvafiq arayışın hazırlanması Agentliyin struktur bölməsində aparıldıqda 100 laridən (63 manat) 180 lariyə (114 manat) qaldırılır. Agentlikdən kənarda, sifariş əsasında aparıldıqda isə 130 laridən (82 manat) 200 lariyə (126 manat) artırılır.

Gömrük deklarasiyasının və qeydiyyat sənədlərinin hazırlanması üçün xidmət haqqı da 130 laridən 200 lariyə yüksəldilir.

Bundan əlavə, qanun layihəsi yeni xidmət növü yaradır. İxrac və ya re-ixrac üçün gömrük ərazisindən çıxarılacaq avtomobillərə tranzit nömrə nişanlarının verilməsi üçün yeni tarif müəyyən edilir ki, bu da 150 lari (69 manat) olacaq.

Məlumat üçün bildirək ki, Gürcüstan Statistika Xidməti bu ilin yanvar-oktyabr aylarında Azərbaycana 181 milyon dollar dəyərində 6 771 ədəd avtomobil ixrac olunduğunu açıqlayıb.//yeniavaz.com