İrana görə konqres qarşısında İFADƏ VERƏCƏK
29 Aprel 2026 16:59 | Baxış sayı: 108
ABŞ-nin müharibə naziri Pit Heqset ölkənin İranla davam edən hərbi münaqişəsi barədə qanunvericilərin suallarını cavablandırmağa hazırlaşır.
AJMEDİA.NEWS xəbər verir ki, Nümayəndələr Palatasının Silahlı Qüvvələr Komitəsində keçiriləcək dinləmələrdə Birləşmiş Qərargah Rəisləri Komitəsinin sədri, general Den Keyn də iştirak edəcək.
Hər iki partiyanın nümayəndələri əvvəllər qapalı brifinqlərdə təqdim olunan məlumatlardan narazılıqlarını bildirdikləri üçün iclasın kifayət qədər gərgin keçəcəyi gözlənilir. Dinləmələrin gündəliyi rəsmən Tramp administrasiyasının 1,5 trilyon dollar məbləğində büdcə sorğusuna həsr olunsa da, demokratlar bu fürsətdən istifadə edərək Pentaqon rəhbəri Pit Heqseti kəskin tənqid etməyi planlaşdırırlar. Onlar naziri Konqresin rəsmi razılığı olmadan müharibəyə başlamaqda ittiham edirlər.
Respublikaçılar hələlik rəhbərliyə etimadlarını qoruyub saxlasalar da, münaqişənin tezliklə başa çatdırılmasını və administrasiyanın fəaliyyətində şəffaflığın təmin olunmasını tələb edirlər. Dinləmələr ərəfəsində bir qrup demokrat konqresmen Küveytdə altı hərbçinin həlak olması ilə bağlı araşdırma tələb edərək, Heqseti ictimaiyyətə yanlış məlumat verməkdə günahlandırıb.
