Kralın qızını oğluna alacaq, üstündə də Qrenlandiya hədiyyə: Tramp qədim hökmdarların yolu ilə GEDİR

Qrenlandiya ətrafında ABŞ-Danimarka xəttində gedən müzakirələr bu dəfə rəsmi diplomatiya yox, sosial şəbəkə yumoru ilə gündəmə gəlib.

AJMEDİA.NEWS xəbər verir ki, sosial platformalarda yayılan satirik paylaşımlarda Qrenlandiyanın ABŞ-a “ən sakit və bir güllə belə atmadan” verilməsinin qeyri-adi yolu irəli sürülüb.

İronik “plan”a görə, ABŞ prezidenti Donald Tramp oğlunu Danimarka kral ailəsinin üzvü olan Princess Isabella ilə evləndirərsə, Qrenlandiya da cehiz kimi ABŞ-a keçə bilər.

Paylaşım müəllifləri bu ideyanı “qədim hökmdarların evlilik diplomatiyasının müasir versiyası” adlandırırlar.

Sosial şəbəkə istifadəçiləri açıq şəkildə bunun zarafat və siyasi satira olduğunu vurğulasalar da, mövzu qısa müddətdə geniş yayılıb, minlərlə şərh və paylaşım toplayıb. Bəzi istifadəçilər bunu “əsrin diplomatik manevri”, digərləri isə Qrenlandiya məsələsinin nə qədər absurd müzakirə müstəvisinə keçdiyinin göstəricisi kimi dəyərləndirib.

Qeyd edək ki, Qrenlandiya uzun müddətdir ABŞ-ın strateji maraq dairəsindədir və bu mövzu müxtəlif illərdə Vaşinqtonun rəsmi dairələrində də səsləndirilib. Son “təklif” isə rəsmi siyasətdən daha çox sosial şəbəkə fantaziyasının məhsulu kimi qiymətləndirilir.