Lənkəranda müsadirə olunan torpağın indiki və sabiq deputatlarla nə əlaqəsi var? – Fotolar

Lənkəran şəhəri, 21-ci məhəllə ünvanında yerləşən torpaq sahəsi hərrac vasitəsilə satışa çıxarılıb.
AJMEDİA Yeniavaz.com-a istinadən xəbər verir ki, torpaq sahəsi icra məmurlarının sifarişi əsasında hərraca çıxarılıb.

Satışa çıxarılan torpağın sahəsi 0,05825 hektara bərabərdir. Hərraca çıxarılan torpağın ilkin bazar qiyməti 41 min 516 manat 36 qəpik, minimum satış qiyməti isə 35 min 288 manat 90 qəpik təşkil edir.

Qeyd edək ki, paylaşılan hərrac elanında torpaqla bərabər bir obyektin və çoxlu sayda nəqliyyat vasitələrinin də fotosu yer alıb. Fotolardan belə görünür ki, hərraca çıxarılan torpaq sahəsinin girişində və nəqliyyat vasitəsinin üzərində “Ukrayna Ticarət Evinin Azərbaycan Respublikasında Topdan Satış Mərkəzi” yazılıb.

Məlumat üçün bildirək ki, 10 manat nizamnamə kapitalı olan “Ukrayna Ticarət Evi” MMC (VÖEN – 1404173661) 6 aprel 2018-ci il tarixində dövlət qeydiyyatına alınıb. MMC dövlət qeydiyyatına alınan zaman şirkətin qanuni təmsilçisi Yuriy Osadçenko Leonidoviç olub. Daha sonra MMC-nin qanuni təmsilçisi Əlibala Məhərrəmzadə Səttar oğlu olub. Hazırda isə şirkətə Məhərrəmzadə Nərmin Eysan qızı rəhbərlik edir.

Qeyd edək ki, “Ukrayna Ticarət Evi” MMC-nin qanuni təmsilçisi olmuş Əlibala Məhərrəmzadə sonuncu seçkilərdə 59 saylı Quba seçki dairəsindən deputat seçilib. Seçkilərdən bir müddət sonra onun köməkçisi Elnur Xəlilov Yeniavaz.com-a bildirib ki, Əlibala Məhərrəmzadə 6 sentyabr 2024-cü il tarixindən “Ukrayna Ticarət Evi” MMC-nin təsisçiliyindən azad olunub.

Xatırladaq ki, 2022-ci ilin yanvar ayında Ukrayna Prezidenti Volodimir Zelenski Məhərrəmzadə Əlibala Səttar oğlunu III dərəcəli “Xidmətə görə” (“За заслуги”) ordeni ilə təltif edib. Volodimir Zelenski 2019-cu ildə Bakıda “Ukrayna Ticarət Evi” MMC-yə məxsus “Ukrayna Məhsulları” ticarət şəbəkəsinin mərkəzi mağazasının açılış mərasimində də iştirak edib.

Onu da qeyd edək ki, hərrac elanında yer alan fotolarda “Lerik Broyler” MMC-yə (VÖEN – 6300158201) məxsus “Lebro” brendinin böyük reklam lövhələri də görünür.

Lerik rayonunun Piran kəndində fəaliyyət göstərən “Lerik Broyler” MMC isə 2010-cu ildən fəaliyyət göstərir. Nizamnamə kapitalı 20 manat olan MMC-nin qanuni təmsilçisi Şiriyev Emil İmran oğludur. Daha əvvəl isə MMC-yə sabiq millət vəkili İqbal Məmmədovun qardaşı oğlu Orxan Nərimanlı rəhbərlik edib. Mətbuatda yayılan məlumatlarda “Lerik Broyler”in sabiq millət vəkilinə məxsus olduğu barədə çoxsaylı məlumatlar yer alıb. Hazırda isə “Lerik Broyler” MMC-nin dövlət büdcəsinə vaxtında ödənilməyən 253 min 166 manat 48 qəpik vergi borcu var.