Neft Fondu 73,5 milyard dolları harada saxlayır?

Bu ilin aprel ayının əvvəlinə olan məlumata görə, Dövlət Neft Fondunun (ARDNF) investisiya portfelinin həcmi 73 milyard 515,2 milyon dollar təşkil edib.
AJMEDIA xəbər verir ki, Neft Fondunun investisiya portfelindəki vəsaitlərin 25,9%-i və ya 19,04 milyard dolları Avropa regionunda yerləşən ölkələrdə saxlanılır.

Qeyd edək ki, son bir il ərzində Avropada saxlanılan vəsaitlərin payı azalsa da, məbləğ olaraq artıb. Belə ki, ötən ilin aprel ayının əvvəlinə olan göstəricilərə əsasən, investisiya portfelinin 29,8%-i və ya 18,6 milyard dolları Avropada yerləşirdi.

Şimali Amerikada saxlanılan vəsaitlərin payı eyni dövrdə 26,2%-dən 26,5%-ə qədər artıb. Dollar ifadəsində bu göstərici 19,5 milyard dollardan 16,36 milyard dollara düşüb.

Ən çox artım isə Azərbaycanda saxlanılan qızıl ehtiyatlarında qeydə alınıb. Neft Fondunun ümumi investisiya portfelinin 35,6%-i və ya 26,17 milyard dolları qızılda saxlanılır. Ötən ilin eyni dövründə bu göstərici müvafiq olaraq 25,8% və ya 16,1 milyard dollar dəyərində olub.

Bunlardan başqa, Neft Fondunun investisiya portfelinin 8%-i Asiya ölkələrində (ötən il 11,8% olub), 1,4%-i Yaxın Şərq ölkələrində (ötən il 0,8%), 1,6%-i beynəlxalq maliyyə təşkilatlarında (ötən il 4,8%), 0,9%-i Avstraliya və Yeni Zelandiyada (ötən il 0,7%), 0,1%-i isə Latın Amerikası ölkələrində (dəyişməyib) saxlanılıb.//yeniavaz.com