Pezeşkian istefa verir? – Prezident SEPAH-ı Laricaninin qətlində ittiham etdi

İran Prezidenti Məsud Pezeşkianın Milli Təhlükəsizlik Ali Şurasının katibi Əli Laricaninin ölümündən sonra ölkədəki hərbi-siyasi elitada yaranmış dərin parçalanma səbəbindən istefa verməyə hazırlaşdığı barədə məlumatlar yayılıb.

AJMEDİA.NEWS xəbər verir ki, İsrailin "14-cü kanal"ının baş analitiki Dror Balazada kəşfiyyat mənbələrinə istinadən bildirib ki, prezident Pezeşkian yüksək rütbəli rəsmilərin ard-arda ləğv edilməsi dalğasına görə İslam İnqilabı Keşikçiləri Korpusunu (SEPAH) birbaşa günahlandırır.

Xüsusilə Əli Laricaninin İsrail zərbəsi nəticəsində həlak olması prezidentin səbr kasasını daşırıb; Pezeşkian hesab edir ki, Laricaninin qorunmasındakı uğursuzluk sadəcə səhlənkarlıq deyil, nüfuzlu siyasətçini aradan qaldırmaq üçün SEPAH tərəfindən atılmış qəsdən addımdır.

İsrail kanalının iddialarına görə, SEPAH rəhbərliyi, əksinə, Laricaninin ölümündən "çox razıdır" və Korpusun hələ əvvəlcədən Əli Laricani və onun qardaşına qarşı xüsusi "ləğvetmə dosyası" hazırladığı vurğulanır. Hazırda bu sensasiyalı məlumatla bağlı rəsmi Tehran sükutu qorusa da, prezident administrasiyası ilə hərbi xunta arasındakı gərginliyin ölkəni daxili idarəetmə böhranına sürüklədiyi aydın görünür. Ekspertlər hesab edirlər ki, Pezeşkianın istefası Müctəba Xamenei rejiminin tamamilə SEPAH-ın diktaturası altına keçməsi ilə nəticələnə bilər.