Pezeşkiandan şok iddia: "Prezidentimizi öldürdülər, alimlərimizi bir-bir sıradan çıxardılar"

İran Prezidenti Məsud Pezeşkian Mazandaran vilayətinin Planlaşdırma Şurasının iclasında çıxış edərək həm ölkə daxilindəki son hadisələr, həm də beynəlxalq münasibətlər barədə bir-birindən kəskin bəyanatlar səsləndirib.

AJMEDİA.NEWS xəbər verir ki, Pezeşkian Qərbin insan haqları ilə bağlı ittihamlarını rədd edərək, İranın özünün terror qurbanı olduğunu vurğulayıb.

Dövlət xadimlərinə qarşı sui-qəsdlərdən danışan Pezeşkian birbaşa ittiham irəli sürüb: "Bizim prezidentimizi (İbrahim Rəisi nəzərdə tutulur - red.) öldürdülər, imamımızı qətlə yetirdilər, nüvə alimlərimizi bir-bir sıradan çıxardılar. Bu cinayətlərin məqsədi bizi qabiliyyətli və təhsilli insanlardan məhrum etmək idi ki, ölkəmizə xidmət edə bilməyək".

Yanvar ayında baş verən kütləvi iğtişaşlara toxunan prezident bildirib ki, etirazlar zamanı 350-dən çox məscid və 300 məktəb yandırılıb. O, ABŞ və Avropanı ikili standartlarda ittiham edib: "ABŞ-da kimsə polisə toxunsa, ona qarşı ən sərt tədbirlər görülür. Bizdə isə hüquq-mühafizə orqanlarının əməkdaşlarını və bəsiciləri öldürürlər, sonra da İranı terrorçu dövlət adlandırırlar. Məktəb və məscid yandıran etirazçı deyil, o, hakimiyyəti devirməyə çalışır".

Pezeşkian İsrailin regiondakı rolunu kəskin tənqid edərək qeyd edib ki, bir neçə milyonluq əhalisi olan bu dövlət bütün Yaxın Şərqi alova bürüyüb və islam ölkələrini bir-birinə düşmən edib. O həmçinin ABŞ Prezidenti Donald Trampın yanvar iğtişaşları zamanı 32 min insanın qətlə yetirilməsi barədə iddiasını da "əsassız yalan" adlandırıb:

"Biz bütün qurbanların adlarını və şəxsiyyət vəsiqələrinin nömrələrini dərc etmişik. Başqa rəqəmi olan varsa, sübut təqdim etsin".

İran lideri xatırladıb ki, müharibənin (İran-İraq müharibəsi və daxili çəkişmələr nəzərdə tutulur) ilk günlərində ölkə küçələrində 28 mindən çox qətl törədilib. O, İranın bu cür ağır sınaqlardan keçərək bu günə gəldiyini və heç bir gücün ölkəni iflic edə bilməyəcəyini vurğulayıb.