Türkiyənin tanınmış aktyoru VƏFAT ETDİ - FOTOLAR

Türk kinosunun tanınmış simalarından biri olan Ali Tutal 76 yaşında vəfat edib. O, keçirdiyi beyin qanamasından sonra xəstəxanaya yerləşdirilib və müalicə aldığı tibb müəssisəsində dünyasını dəyişib.

AJMEDIA.NEWS "Haberler.com"a istinadən xəbər verir ki, sənətçinin vəfatı həm sənət camiyəsində, həm də pərəstişkarları arasında dərin kədər yaradıb.

Məlumata görə, Ali Tutal evində beyin qanaması keçirib və dərhal xəstəxanaya aparılıb. Yanvarın 27-dən etibarən reanimasiya şöbəsində müalicə alan aktyor süni tənəffüs aparatına qoşulub.

Qeyd edək ki, sənətçi ötən ilin mart ayında da ürək tutması keçirmiş və bir müddət müalicə almışdı.

Ali Tutal yaradıcılığı boyunca 50-dən çox bədii filmdə və 20-dən artıq televiziya serialında rol alıb. O, xüsusilə “Güneşi Gördüm”, “Geniş Aile” və “Bereketli Topraklar Üstünde” kimi ekran işlərindəki obrazları ilə tamaşaçıların yaddaşında qalıb.

1950-ci ildə Diyarbakırda anadan olan Ali Tutal Siyasi Elmlər və Biznesin İdarə Edilməsi fakültəsini bitirib. Əmək fəaliyyətinə fərqli sahələrdə başlayan sənətçi 1975-1976-cı illərdə kino sektorunda peşəkar fəaliyyətə başlayıb.

Aktyor fəaliyyəti ilə yanaşı, texniki sahədə də çalışan Tutal dublyaj rəhbəri və yerli aksent üzrə məsləhətçi kimi də fəaliyyət göstərib. Həm kamera qarşısında, həm də texniki dəstək sahəsində imza atdığı layihələrlə o, Türk kino və televiziya sektorunun hörmətli və təcrübəli simalarından biri kimi tanınıb.