Valideyn sağdırsa, qardaş-bacının miras hüququ varmı?

Miras məsələləri ailə münasibətlərində ən həssas hüquqi mövzulardan biridir. Xüsusilə tez-tez verilən suallardan biri də budur: valideyn sağ olduğu halda mərhumun qardaş və bacıları miras hüququ əldə edə bilərmi? Azərbaycan qanunvericiliyi bu suala aydın və konkret cavab verir.

Bu dəfə də vərəsəliklə bağlı ən çox verilən sualları Azərbaycan Vəkillər Kollegiyasının üzvü, vəkil Avraam Berman cavablandırıb:

Sual: Valideyn sağ olduğu halda qardaş və bacı miras ala bilərmi?

Cavab: Xeyr. Azərbaycan qanunvericiliyinə görə, valideyn sağ olduğu müddətdə qardaş və bacının miras hüququ yaranmır. Çünki valideyn birinci növbəli vərəsə hesab olunur və onun mövcudluğu növbəti vərəsələrin mirasa cəlb edilməsini istisna edir.

Sual: Ümumiyyətlə miras kimlərə və hansı ardıcıllıqla keçir?

Cavab: Miras qanunla müəyyən olunmuş növbəlilik əsasında bölünür. Birinci növbəli vərəsələr mərhumun həyat yoldaşı, uşaqları və valideynləridir. Bu şəxslərdən heç olmasa biri sağdırsa, ikinci və növbəti dərəcəli qohumlar miras ala bilməz.

Sual: Qardaş və bacı hansı hallarda vərəsə sayılır?

Cavab: Qardaş və bacılar ikinci növbəli vərəsələrdir. Onların miras hüququ yalnız o halda yaranır ki, mərhumun nə valideyni, nə uşağı, nə də həyat yoldaşı olsun. Yalnız bu şərtlər mövcud olmadıqda miras qardaş-bacılara keçir.

Sual: Valideyn sağ ikən övladlar arasında miras bölgüsü mümkündürmü?

Cavab: Miras bölgüsü mümkün deyil, çünki miras yalnız ölüm faktından sonra açılır. Lakin valideyn sağ ikən əmlakın gələcək taleyini müəyyən edə bilər. Bunun üçün vəsiyyət tərtib etmək və ya əmlakı bağışlama yolu ilə övladlara vermək mümkündür.

Sual: Bu mövzuda vətəndaşların ən çox etdiyi səhv nədir?

Cavab: Ən çox edilən səhv ondan ibarətdir ki, valideyn sağ olduğu halda qardaş və bacılar özlərini avtomatik vərəsə hesab edirlər. Bu, hüquqi yox, emosional yanaşmadır və qanunvericiliyə uyğun deyil. Bu yanlış düşüncə ailədaxili mübahisələrə və əsassız məhkəmə çəkişmələrinə səbəb olur.

Sual: Belə mübahisələrin qarşısını almaq üçün nə etmək olar?

Cavab: Ən düzgün yol valideyn sağ ikən hüquqi mexanizmlərdən istifadə etməkdir. Vəsiyyətin vaxtında tərtib olunması və ya əmlakın bağışlanması ailə üzvləri arasında sonradan yarana biləcək mübahisələrin qarşısını alır və hüquqi aydınlıq yaradır.

ajmedia.news