Xameneini əvəz edəcək dini lider seçildi - İranda keçid dövrü başladı

İranın dövlət xəbər agentliyi ISNA-nın yaydığı məlumata görə, ayətullah Əli Xameneyinin ölümündən sonra ölkənin Ali Rəhbəri vəzifəsinin müvəqqəti icrası ayətullah Əlirza Ərafiyə həvalə olunub.

AJMEDIA xəbər verir ki, 67 yaşlı Əlirza Ərafi müəyyən bir müddət ərzində İranın ən yüksək dini və siyasi lideri səlahiyyətlərini yerinə yetirəcək. O, İranın nüfuzlu şiə ayətullahlarından biri hesab olunur və uzun müddətdir ki, ölkənin dini iyerarxiyasında mühüm vəzifələr tutur.

Əlirza Ərafi kimdir?

İranda dini seminariyalara rəhbərlik edib;

Şiəliyin xaricdə təbliği və yayılması prosesinə kuratorluq edib;

Ekspertlər Şurasının üzvüdür və uzun müddətdir ki, Xameneyinin potensial varislərindən biri kimi görülürdü.

Onun bu vəzifəyə təyin olunması, Ekspertlər Şurasının bu gün keçirilən təcili iclasının ilk mühüm qərarı kimi qiymətləndirilir. Regionda vəziyyətin gərgin olduğu bir vaxtda Ərafinin üzərinə həm daxili sabitliyi qorumaq, həm də xarici təhdidlərə qarşı vahid mövqe nümayiş etdirmək kimi çətin missiya düşür.//musavat.com