Zelenski Moskvaya getsə... - Kremldən hiyləgər təklif

Rusiya və Ukrayna prezidentləri - Vladimir Putin və Volodimir Zelenski arasında əlaqə yalnız Moskvada mümkündür. Bunu Rusiya prezidentinin mətbuat katibi Dmitri Peskov bildirib.

Kremlin sözçüsü jurnalistlərə deyib ki, "Zelenski əlaqələr təklif edir, Putin onların Moskvada mümkün olduğunu bildirib. Bu, bizim mövqeyimiz olaraq qalır".

Zelenski Moskvaya gedərmi?

AJMEDİA.NEWS xəbər verir ki, politoloq Xəyal Bəşirov Musavat.com-a bildirib ki, Rusiya bilərəkdən qəbuledilməz sərtlər irəli sürür: "Rusiya həmişə belə edir. O səviyyədə ağır şərtlər irəli sürürlər ki, qarşı tərəf üçün qəbuledilməz olsun. Bu da ondan xəbər verir ki, Rusiya müharibəni davam etdirmək niyyətindədir. İndiki mərhələdə İranla ABŞ və İsrail arasında gedən proseslər sanki Rusiya-Ukrayna müharibəsini arxa plana keçirə bilib. Dünyanın diqqəti daha çox İran-ABŞ gərginliyinə yönəlib. Belə bir vəziyyət Rusiyanı bir qədər arxayınlaşdırıb. Hər dəfə Ukrayna tərəfinin müəyyən razılığa meylli olduğu müşahidə ediləndə Kreml elə bir şərt irəli sürür ki, o şərt Ukrayna tərəfi üçün ya qəbuledilməz olsun, ya da çox çətinliklə qəbul edilə bilsin.

İran məsələsinin aktuallaşması Ukrayna hakimiyyətini narahat edir. Onlar düşünürlər ki, bu vəziyyətdən Rusiya maksimum istifadə edəcək. Ona görə də Zelenski istənilən formatda danışıqlara hazır olduğunu bəyan etdi. Amma bu, o demək deyil ki, Zelenski əraziləri güzəştə getmək üçün danışıqlara hazırdır”.

Ekspertin qənaətincə, Zelenski üçün Moskvaya səfər etmək o qədər də asan deyil: “Bu, ilk növbədə Ukrayna cəmiyyəti tərəfindən qəbul edilməyəcək. 4 ildir Ukrayna xalqına fəlakətlər yaşadan bir dövlətin paytaxtına Zelenskinin getməsi xalq tərəfindən yaxşı qarşılanmaz. Həm bu səbəbə görə, həm də özünün şəxsi təhlükəsizliyi baxımından Zelenskinin Moskvaya Putinlə görüş təklifini qəbul edəcəyi mümkün görünmür. O, öz ayağı ilə Moskvaya gedib “gəldim məni həbs edin” effekti yarada bilən addımı atmaz. Rusiya tərəfi də bunu yaxşı bilir. Sadəcə qəsdən o cür təklif irəli sürürlər ki, Zelenski imtina etsin və dünyaya bəyan etsinlər ki, Ukrayna danışıqlardan boyun qaçırır”.

Xatırladaq ki, 4-5 fevral tarixlərində Birləşmiş Ərəb Əmirliklərində Rusiya, ABŞ və Ukrayna nümayəndələri arasında danışıqlar davam etdiriləcək. Lakin analitiklər danışıqların bu raundunun da ciddi nəticə verməyəcəyini proqnozlaşdırırlar.