ABŞ-nin F-15 pilotunun xilas edilməsinin YENİ DETALLARI

ABŞ prezidenti Donald Tramp İran üzərində vurulan F-15 qırıcısının pilotunun xilas edilməsi ilə bağlı bəzi təfərrüatları açıqlayıb.

AJMEDİA.NEWS xəbər verir ki, "Axios" nəşrinin yaydığı məlumata görə, ABŞ prezidenti ilkin mərhədə Vaşinqtonun pilotdan gələn qeyri-adi radio mesajı səbəbindən Tehranın xilasetmə qüvvələri üçün tələ hazırladığından ehtiyat etdiyini bildirib.

Tramp təyyarənin daşınan zenit-raket kompleksi ilə vurulduğunu qeyd edərək, İran hərbçilərinin bu uğurunu "Onların sadəcə bəxti gətirdi" sözləri ilə şərh edib.

Lakin ən böyük çaşqınlığa pilotun göndərdiyi təcili yardım siqnalı səbəb olub.

ABŞ rəsmiləri siqnalın saxta ola biləcəyindən və İranın axtarış-xilasetmə qruplarını pusquya salmaq üçün öz ritorikasından istifadə edərək pilotun səsini təqlid etdiyindən şübhələniblər.

Trampın sözlərinə görə, pilot katapult etdikdən sonra ratsiya vasitəsilə qısa və qeyri-adi mesaj ötürüb.

Maraqlıdır ki, dövlət başçısının səsləndirdiyi mesaj variantı müdafiə naziri Pit Heqsetin versiyasından fərqlənir. Belə ki, Tramp pilotun "Qüvvət Tanrı ilə olsun" dediyini bildirdiyi halda, Heqset hərbçilərdən "Tanrı böyükdür" siqnalı alındığını vurğulayıb.

Tramp əlavə edib ki, zabiti tanıyan şəxslər onun dindar biri olduğunu və bu cür ifadə işlətməsinin onun üçün məntiqli olduğunu izah ediblər.

Prezident pilotun axtarış əməliyyatını son dərəcə intensiv adlandırıb və qeyd edib ki, "minlərlə vəhşi" onu əsir götürmək üçün ərazini qarış-qarış gəzirmiş.

Pentaqonun narahatlığı isə sağ qalmış ekipaj üzvünün sözlərinin "sanki bir müsəlman tərəfindən deyilmiş kimi" səslənməsi ilə bağlı olub ki, bu da dezinformasiya riski səbəbindən qərar qəbulu prosesini bir müddət iflic edib.