Azərbaycanda bu yağın satışı və idxalı DAYANDIRILDI

Yağ istehsalı və idxalı ilə məşğul olan “Alda” MMC-də yoxlama aparılıb.

Bu barədə AJMEDİA.NEWS-a Qida Təhlükəsizliyi Agentliyindən məlumat verilib. Bildirilib ki, risk əsaslı yanaşma çərçivəsində ölkəyə idxal olunan xam və istehlaka hazır palma yağları, eləcə də palma yağı tərkibli qarışıq bitki yağları üzrə nəzarət tədbirləri davam etdirilir.

Növbəti nəzarət tədbiri “Alda” MMC-nin istehsal müəssisəsində keçirilib. Şirkətin Rusiya Federasiyasından idxal etdiyi “Пищевые Ингредиенты” istehsalçısına məxsus “EFKO” əmtəə nişanlı palma yağında laborator müayinə zamanı kimyəvi emal çirkləndiricisi – 3-monoxlorpropan-1,2-diol aşkarlanıb. Həmin xammalın spred yağlarının istehsalında istifadə olunduğu və hazır məhsul nümunələrində də eyni uyğunsuzluğun müəyyən edildiyi bildirilib.

Faktla bağlı sahibkar barəsində inzibati tədbir görülüb, məhsul partiyalarının satışı və müəssisədə spred yağlarının istehsalı məhdudlaşdırılıb.Qeyd edək ki, xammal yağının istehsal olunduğu müəssisədən ixracın dayandırılması barədə Rusiya Federasiyasının aidiyyəti qurumuna müraciət olunub.