Hava şəraiti bu tarixdən kəskin DƏYİŞƏCƏK: Əhalinin NƏZƏRİNƏ!

Sentyabr ayı ilə birlikdə havalar yavaş-yavaş soyumağa başlayıb. Yay fəslinin isti günləri geridə qalır, payız isə artıq özünü hiss etdirir. İqlim dəyişikliyinin təsirləri fonunda temperatur dəyişkənliyi, qəfil yağışlar və hava şəraitində gözlənilməz dalğalanmalar müşahidə olunur. Mütəxəssislər isə xəbərdarlıq edirlər ki, qarşıdan gələn qış mövsümündə bölgədə çox ciddi soyuqlar qeydə alına bilər.

Bəs, nə zamandan etibarən havalar soyumağa başlayacaq?

AJMEDİA.NEWS-un məlumatına görə, məsələ ilə bağlı Ekologiya və Təbii Sərvətlər Nazirliyi yanında İctimai Şuranın sədri Amin Məmmədov News24.az-a açıqlamasında bildirib ki, havanın temperaturunun necə dəyişəcəyini dəqiq proqnozlaşdırmaq çətindir:

"Bununla bağlı bəzi təhlillər aparılır. Əsasən də qonşu ölkələrin – Türkiyə, Rusiya, həmçinin Xəzər dənizinin şərq sahilində yerləşən Mərkəzi Asiya dövlətlərinin hava kütlələri daim hərəkətdə olur və bölgəmizə təsir göstərir. Havanın soyuması bəzən sentyabrın sonuna qədər uzana, bəzən isə noyabrın ortalarına qədər mülayim hava şəraiti qala bilər. İqlim dəyişikliklərinin təsirini son illərdə daha aydın müşahidə edirik. Keçən il, məsələn, noyabr ayında olmasına baxmayaraq hava olduqca mülayim idi. Əgər şimaldan və ya qərbdən – Avropadan hava kütlələri gəlirsə, bu, sentyabrın sonlarında intensiv yağışlara və temperaturun kəskin enməsinə səbəb ola bilər”, – deyə Amin Məmmədov vurğulayıb.

O, həmçinin qeyd edib ki, ay tutulmaları kimi astronomik hadisələr də müəyyən qədər iqlim proseslərinə təsir göstərir:

"Dünənki ay tutulması okeanlarda qabarma və çəkilmələrə səbəb olur. Bu kimi dəyişikliklər qlobal hava proseslərinə dolayı təsir edir. Qarşıdakı payız və qış mövsümündə də hava şəraiti əvvəlcədən proqnozlaşdırılandan fərqli ola, yəni həm gözlənilməz istilik, həm də kəskin soyuq dalğaları müşahidə edilə bilər".