İranda etirazları dəstəkləyən məşhurlara və idmançılara cinayət işi açıldı

İran prokurorluğu ölkədəki iğtişaşları dəstəklədiklərinə görə ümumi sayları 25 nəfər olan idmançı, aktyor və rejissorlardan ibarət şəxslərə qarşı cinayət işi açıb.

AJMEDİA.NEWS xəbər verir ki, bu barədə "Mehr" agentliyi İranın məhkəmə sisteminin mətbuat xidmətinə istinadən məlumat yayıb.

Xəbərə görə, etirazlarla əlaqədar Tehran prokurorluğu 15 idmançı və 10 kino xadiminə ittiham irəli sürüb.

Prokurorluq şübhəli şəxslərdən bəzilərinin əmlakına həbs qoyulması barədə qərar verib və iğtişaşçıların vurduğu ziyana görə kompensasiya ödəməyi tapşırıb.

Xatırladaq ki, 2025-ci il dekabrın 29-da Tehranda İran rialının kəskin düşməsi səbəbindən ticarətçilərin etiraz aksiyaları başlayıb. Bir gün sonra etirazlara tələbələr də qoşulublar. Narazılıqlar qısa müddətdə İranın əksər iri şəhərlərinə yayılıb. 2026-cı il yanvarın 2-də vəziyyət daha da gərginləşib - şəhər küçələrində naməlum silahlı qruplar peyda olub. Etirazçılarla hüquq-mühafizə orqanları arasında silahlı toqquşma halları artıb.

İğtişaşların zirvəsi 8 yanvar axşamına təsadüf edib, bu zaman ən azı 12 mülki vətəndaş, o cümlədən bir uşaq həlak olub. Hakimiyyət orqanları 25 hüquq-mühafizə əməkdaşının həlak olduğunu bildirib. Tehran meri Əlirza Zakani deyib ki, etirazçılar paytaxtda 25 məscidi yandırıb, 26 bank, üç tibb mərkəzi, 10 dövlət müəssisəsi, 48 yanğınsöndürən maşın, 42 avtobus və təcili yardım maşını, həmçinin 24 mənzilə ziyan vurublar. İran hakimiyyəti iğtişaşçıları terrorist adlandırıb və hadisələrin təşkilində İsrail və ABŞ-ni təqsirləndirib.