Köçəryan ölkədən çıxmaq istədi, aeroportda SAXLANILDI

Ermənistanın ikinci prezidenti Robert Köçaryanla bağlı yayılan xəbərlər gündəm olub.

AJMEDİA.NEWS xəbər verir ki, Ermənistan mediasında yayılan məlumatlara görə, Robert Köçaryan İrəvandakı Zvartnots Beynəlxalq Hava Limanından ölkəni tərk etmək istəyərkən hüquq-mühafizə orqanlarının müdaxiləsi ilə üzləşib və onun ölkədən çıxışına icazə verilməyib.

Məlumatlara əsasən, hadisə Köçaryanın xaricə səfərə hazırlaşdığı vaxt baş verib. Maraqlıdır ki, bundan bir neçə saat əvvəl sabiq prezidentin ofisi onun şəxsi xarakterli səfərlə üç günlük müddətə Ermənistanı tərk edəcəyini açıqlamışdı.

Daha sonra yerli media orqanlarında Köçaryanın hava limanında saxlanıldığı və ölkədən çıxışının məhdudlaşdırıldığı barədə xəbərlər yayılıb. Hadisənin səbəbi barədə isə hələlik rəsmi məlumat verilməyib.

Robert Köçaryan hazırda Ermənistanın əsas müxalif siyasi fiqurlarından biri hesab olunur və onun rəhbərlik etdiyi siyasi düşərgə Baş nazir Nikol Paşinyan hakimiyyətinin əsas tənqidçilərindəndir. Bu səbəbdən hava limanında baş verən hadisə ölkə daxilində geniş müzakirələrə səbəb olub.