İsrail dünyada Somalidən ayrılan Somalilendin müstəqilliyini tanıyan ilk ölkə oldu

İsrail, Somalinin ayrılmış dövləti olan Somaliland-ı rəsmi olaraq tanıyan ilk ölkə oldu.

İsrail xarici işlər naziri Gideon Saar sosial media platforması X-də yazıb ki, iki tərəf "səfirlərin təyin edilməsi və səfirliklərin açılması da daxil olmaqla tam diplomatik münasibətlər" quracaqlar. O, əlavə edib ki, "Mən nazirliyimə ölkələrimiz arasında geniş sahələrdə əlaqələrin qurulması üçün təcili tədbirlər görməyi tapşırmışam".

Baş nazir Benyamin Netanyahu bildirib ki, İsrail kənd təsərrüfatı, səhiyyə və texnologiya sahələrində Somaliland ilə əməkdaşlığı dərhal genişləndirmək niyyətindədir.

Özünü Somaliland elan edən ölkənin prezidenti Məhəmməd Abdullahi İsrailin qərarını tarixi bir an adlandırıb. O, həmçinin Somaliland-ın Tramp administrasiyası tərəfindən irəli sürülən İsrail və əsasən müsəlman ölkələri arasında qarşılıqlı tanınma və diplomatik münasibətlərin qurulması haqqında bir sıra müqavilələrə - İbrahim Sazişlərinə qoşulacağını açıqlayıb.

Somalinin beynəlxalq səviyyədə tanınmış prezidenti Həmzə Abdi Barre İsrailin bu addımını ölkəsinin suverenliyinə qəsdən hücum adlandırıb.

Misir, Türkiyə və Cibutinin xarici işlər nazirləri Somali həmkarları ilə dördtərəfli telefon danışığı zamanı İsrailin qərarını pisləyiblər. Onlar sabitliyi pozan və Somalinin dövlət qurumlarına paralel strukturlar yaradan birtərəfli addımlara qarşı xəbərdarlıq etdilər. Nazirlər həmçinin qeyd etdilər ki, suveren dövlətlərin bəzi hissələrinin müstəqilliyinin tanınması beynəlxalq hüquq və BMT Nizamnaməsinə əsasən təhlükəli bir presedent yaradır.

Onlar həmçinin Fələstin əhalisinin vətənlərindən kənara köçürülməsi planlarını rədd etdiklərini bildirdilər.

İsrail son illərdə Afrika və Yaxın Şərq ölkələri ilə münasibətlərini normallaşdırmağa çalışsa da, Qəzzada və İrana qarşı müharibələri buna mane olub.