Kadırovun təyyarəsi təcili Mədinəyə uçub - Övladları ordadır

Çeçenistan lideri Ramzan Kadırovun “Airbus” markalı təyyarəsi martın 4-də Mədinə şəhərinin hava limanına eniş edib.

AJMEDİA.NEWS ArbatMedia saytına istinadla xəbər verir ki, bu, Kadırovun Səudiyyə Ərəbistanına müntəzəm səfər edən övladları Adam və Əlinin bu ölkədə “ilişib qalması” ilə bağlı ola bilər.

Uçuş izləmə məlumatlarına görə, “Airbus ACJ319” təyyarəsi Moskva vaxtı ilə saat 11:42-də Mədinəyə enib. Təyyarənin transponderləri marşrutun bir hissəsində işləməyib, ona görə də onun yola düşmə nöqtəsi hələ də məlum deyil. Təyyarənin siqnalı Mədinəyə yaxınlaşarkən yanıb.

Şəhərin hava limanı hazırda Yaxın Şərqdəki müharibə səbəbindən Səudiyyə Ərəbistanını tərk edə bilməyən digər ölkələrin vətəndaşlarının təxliyəsini təşkil edir. Bu fonda son bir aydır uçuş etməyən təyyarənin gəlişi diqqətləri cəlb edib.

Məlum olduğu kimi, Adam və Əli həm tətil, həm də dini və idman tədbirlərində iştirak etmək üçün müntəzəm olaraq Səudiyyə Ərəbistanına səfər edirlər.

Son zamanlar ictimaiyyət qarşısında çıxışlarına əsasən, Ramzan Kadırovun özü Çeçenistandadır: 27 fevralda o, Məhəmməd peyğəmbərin əmisi Həmzə adına məsciddə cümə namazında iştirak edib.