Naxçıvanda qanunsuz söküntü: dövlətin qadağasına baxmayaraq sakinlərə təzyiq və hədələr İDDİA

Sakinlər tərəfindən mediamıza daxil olan şikayətlərə əsasən Naxçıvan şəhəri, Heydər Əliyev prospekti 22 ünvanında yerləşən yaşayış binasında açıq-aşkar qanunsuz söküntü işləri aparıldığını iddia edirlər. Sakinlərin məlumatına görə onların razılığı olmadan, hər hansı hüquqi razılaşma və rəsmi qərar təqdim edilmədən insanların evləri və obyektləri dağıdılır.

Sakinlərin bildirdiyinə görə, müvafiq dövlət qurumlarından alınan rəsmi cavablarda sözügedən ünvanda heç bir söküntü işinin aparılmasının nəzərdə tutulmadığı açıq şəkildə qeyd olunub. Buna baxmayaraq, faktiki olaraq binada dağıntılar davam etdirilir.

Sakinlərin sözlərinə görə, binada yaşayan və obyektlərdə çalışan kirayəçilər sənədsiz və məcburi şəkildə çıxarılıb, vətəndaşlara bilərəkdən yalan məlumatlar verilib və məsələ ört-basdır edilməyə çalışılıb.

Əllərində rəsmi sənədlər olduğu halda, Seyid ləqəbli Nizameddin Seyidov adlı şəxs və onunla əlaqəli şəxslər tərəfindən sakinlərə açıq təzyiq göstərildiyini iddia edən sakinlər, “biz bu binanı almışıq, bizə heç kim mane ola bilməz” kimi ifadələrlə hədələndiklərini bildirirlər.

İddialara əsasən, bina qəsdən yararsız vəziyyətə salınaraq insanların yaşaması mümkünsüz hala gətirilir. Bu qeyri-insani davranışların nəticəsində yaşlı bir qadın güclü stres keçirərək həyatını itirib. Sakinlər baş verənləri birbaşa məsuliyyətsizlik və qanunsuzluğun acı nəticəsi kimi qiymətləndirirlər.

Məlumata görə, söküntü işlərini “Fortuna” tikinti şirkəti həyata keçirir. Şirkət rəhbərliyi isə sakinlərlə əlaqə yaratmır və ictimaiyyətə hər hansı açıqlama vermir.

Sakinlər qanunsuzluğun dərhal dayandırılmasını, məsul şəxslərin cəzalandırılmasını və məsələnin dövlət nəzarətinə götürülməsini tələb edirlər.

Azərbaycan Yəhudi mediası olaraq qarşı tərəfin fikirlərini də dinləyib, dərc etməyə hazırıq.