Rusiya nəşrindən Türkiyəni qarışdıracaq iddia

Türkiyə Prezidenti Rəcəb Tayyib Ərdoğan uzun müddətdir Ankara kulislərində müzakirə olunan kabinet dəyişikliyini reallaşdırıb. Belə ki, ədliyyə naziri Yılmaz Tunçun yerinə İstanbul Respublika Baş prokuroru Akın Gürlək, daxili işlər naziri Ali Yerlikayanın yerinə isə Ərzurum valisi Mustafa Çiftçi təyin edilib.

Bildirilir ki, hər iki nazir vəzifədən azad olunmaları ilə bağlı özləri xahiş edib. Nazirlər kabinetində dəyişikliyin əsl səbəbləri haqda ən müxtəlif iddialar var.

“Prezident Ərdoğan varisini müəyyən edib”.

AJMEDİA.NEWS xəbər verir ki, bu barədə “Kommersant”nəşri yazır.

“Qərb mediası Türkiyə prezidenti Rəcəb Tayyib Ərdoğanın oğlu Bilalı öz varisi təyin etmək niyyətində olduğunu bildirib. Prezident Rəcəb Tayyib Ərdoğanın 44 yaşlı oğlu Bilal son altı ayda Türkiyədə ciddi siyasi fiqura çevrilib. O, tez-tez atasını xaricə səfərlərdə müşayiət etməyə, əsas hökumət vəzifələrinə namizədlərin seçilməsində iştirak etməyə başlayıb və hakim Ədalət və İnkişaf Partiyasında (AKP) tərəfdarlar qazanmağı bacarıb”-nəşr yazır. “Kommersant” yazır ki, bu günlərdə “Bloomberg” də öz mənbələrinə istinadən Bilal Ərdoğan partiyaya rəhbərlik etmək və vitse-prezident olmaq, daha sonra isə ölkənin ən yüksək vəzifəsində özünü sınamaq üçün hazırlana bilər.

O da qeyd olunur ki, biznesdə, müxtəlif təhsil layihələrində və gənclərlə işlərdə fəal iştirak edən Bilal özü bu planları qəti şəkildə rədd edir və siyasətin heç bir marağı olmadığını iddia edir. Hakimiyyətin “Tayyib Ərdoğandan kiçik Ərdoğana” mümkün ötürülməsi ilə bağlı şayiələr əvvəllər də Türkiyə mediasında yer almışdı. Məsələn, Ərdoğana yaxın tanınmış iş adamı Alparslan Baki Ertekin "siyasət biznes kimidir və partiya miras yolu ilə ötürülə bilər və ötürülməlidir" deyib. Müxalifətdəki Gələcək Partiyasının sədr müavini Ayhan Səfər Üstün bu yaxınlarda qeyd edib ki, hakimiyyətin transformasiyasının “açıq əlamətlər var və bu, təxminən bir il çəkəcək”.

Türkiyədə hakimiyyət keçidinə hazırlıqların dolayı əlamətlərindən biri Ərdoğanın başqa bir mümkün varisi adlandırdığı məşhur xarici işlər naziri Hakan Fidana qarşı münasibətin dəyişməsi haqda iddialardı. “Kommersant” qəzetinin məlumatlı mənbəsinə görə, hökumətyönlü media vaxtaşırı Türkiyə xarici işlər nazirinin populyarlığını artırmamaq üçün onunla bağlı xəbərləri işıqlandırmamaq üçün müraciətlər alır. Məsələn, Ankarada keçirilən bu yaxınlarda səfirlərin konfransında televiziya kanalları tədbiri ilk dəfə canlı yayımlamadı.

Türkiyənin diplomatik dairələrinə yaxın başqa bir mənbə "Kommersant"a bildirib ki, Bilal Ərdoğan tədricən mediada daha çox görünən fiqura çevrilir və onun ətrafında müəyyən bir arxitektura qurulur, lakin eyni zamanda onun nə gücü, nə partiyada, nə də hökumətdə mövqeyi var və hələ heç nəyə nail olmayıb". Rəcəb Tayyib Ərdoğanın 2028-ci ilin may ayında vəzifəsindən getməsi planlaşdırılır və dəfələrlə bildirib ki, bu, onun sonuncu müddətidir - mövcud qanunvericiliyə görə, o, üçüncü müddətə namizəd ola bilməz.