Sevgililər Günü öncəsi “cadugər bazarı”: keçmiş sevgililər üçün bəddualar satılır

ABŞ-də Sevgililər Günü ərəfəsində onlayn platformalarda qeyri-adi və qalmaqallı bir tendensiya üzə çıxıb.

AJMEDİA.NEWS xəbər verir ki, məşhur Etsy marketpleysində özlərini “cadugər” kimi təqdim edən şəxslər keçmiş sevgililər üçün bəddua, lənət və “enerji təsiri” xidmətləri satmağa başlayıblar.

Məlumata görə, bu cür elanların qiyməti 3 dollardan 20 dollara qədər dəyişib. Elanlarda “keçmiş sevgilinin həyatına mənfi enerji göndərilməsi”, “uğursuzluq çağırılması” və “emosional balansın pozulması” kimi iddialar yer alıb.

Platforma rəhbərliyi bu fəaliyyətin qaydalara zidd olduğunu əsas gətirərək onlarla belə mağazanı silsə də, proses bununla dayanmayıb. Bildirilir ki, “cadugərlər” artıq öz şəxsi saytlarına keçərək fəaliyyətlərini davam etdirir, müştəriləri isə əsasən TikTok üzərindən cəlb edirlər.

Sosial şəbəkələrdə yayılan qısa videolar vasitəsilə emosional münasibət travmaları yaşayan istifadəçilər hədəfə alınır, “intiqam”, “ədalətin bərpası” və “enerji tarazlığı” kimi anlayışlarla psixoloji təsir yaradılır.