Sahibkar və memar-dizayner Xəyalə Həsrətova şəriki tərəfindən dələduzluq və əmlakın mənimsənilməsi ilə üzləşdiyini bildirir.

AJMEDİA-a müraciət edən X.Həsrətova qeyd edib ki, təxminən 5 il əvvəl tanışı Nuran Yasinova ilə birlikdə “Toscan” MMC adlı şirkət təsis ediblər. Onun sözlərinə görə, bu il şəriki tərəfindən şirkət faktiki olaraq nəzarətə götürülüb və fəaliyyəti onun iradəsindən kənar dayandırılıb.

Şikayətçi bildirir ki, 2020-ci ildə şirkət hər iki tərəfin 50 faiz payı əsasında yaradılıb. Müəssisədə o, əsasən layihələrin hazırlanması və dizayn işlərinə cavabdeh olub, şəriki isə müştərilərlə əlaqə və kommersiya fəaliyyətini həyata keçirib. Bu müddət ərzində X.Həsrətovaya aylıq 400 manat əməkhaqqı ödənilib.

Onun sözlərinə görə, bu ilin yay aylarında N.Yasinova şirkətin gəlir gətirmədiyini əsas gətirərək MMC-nin bağlanmasını və qeydiyyatının ləğvini təklif edib. Bu təklifdən sonra X.Həsrətova şirkətin 5 il ərzində əldə etdiyi gəlirlərlə bağlı maliyyə hesabatlarının təqdim olunmasını tələb edib.

Şikayətçi iddia edir ki, dəfələrlə müraciət etməsinə baxmayaraq, şirkətə aid sənədlər, müştəri portfeli, hesablaşma qəbzləri və digər sübutlar ona təqdim edilməyib. Qarşı tərəf müxtəlif bəhanələrlə şirkətin gəlirsiz olduğunu bildirsə də, X.Həsrətovanın sözlərinə görə, firmaya məxsus bank kartında olan 12 min manatdan artıq nağd vəsait, eləcə də ofisdə saxlanılan təxminən 5–10 min manat arası pul şəriki tərəfindən götürülərək bölüşdürülməyib.

O, həmçinin bildirir ki, şəriki onu araşdırma və məlumat əldə etmək hüququnu məhdudlaşdıran, yalnız özünün hazırladığı müqaviləni imzalamağa məcbur edib. X.Həsrətova isə həmin sənədin real hesablaşmaya uyğun olmadığını əsas gətirərək, məsələnin şəffaf araşdırılması üçün dövlət orqanlarına müraciət edəcəyini qarşı tərəfə bildirib.

Zaman keçdikcə müxtəlif mənbələrdən əldə etdiyi məlumatlar və apardığı araşdırmalar nəticəsində aldadıldığını anladığını deyən şikayətçi, bu səbəbdən rəsmi qaydada şikayət etmək qərarına gəldiyini vurğulayıb. Onun məqsədi dələduzluq yolu ilə mənimsənildiyini iddia etdiyi maddi vəsaitin geri qaytarılması, şirkətin fəaliyyət dövrünün araşdırılması və mümkün qanunsuzluqların üzə çıxarılmasıdır.

X.Həsrətova bildirir ki, şirkətin fəaliyyəti dövründə əldə olunan gəlirlərdən ona təxminən 200–250 min manat divident ödənilməli idi.

Bundan əlavə, o qeyd edib ki, şirkətə məxsus olan və təxminən 30 min izləyicisi olan “Instagram” səhifəsi naməlum şəraitdə ələ keçirilib və adı dəyişdirilib. Eyni zamanda, orta mülkiyyət hesab edilən müştəri bazasının da qarşı tərəf tərəfindən mənimsənildiyini və onunla paylaşılmadığını deyir. Eləcədə məlum olub ki, "Toscan" MMC-nin iki təsisçi olduğu halda X.Həsrətovanın məlumatı və onun razılığı olmadan şirkət digər təsisçisinin müraciəti tərəfindən fəaliyyəti rəsmi qayda da dayandırılmışdır.

X.Həsrətova bütün bu faktlarla bağlı Bakı şəhər prokurorluğuna, DİN-in Kibercinayətkarlıqla Mübarizə Baş İdarəsinə və digər aidiyyəti dövlət qurumlarına müraciət etdiyini, lakin müraciətlərinin hələlik cavabsız qaldığını bildirib.

Şəkildə: Nuran Yasinova