Trampın hədələri NATO-da parçalanma yaratdı

ABŞ Prezidenti Donald Trampın Qrenlandiyanı ələ keçirməklə bağlı səsləndirdiyi hədələr NATO daxilində ciddi narahatlıq yaradıb.

AJMEDİA.NEWS xəbər verir ki, The i Paper nəşrinin mənbələrə istinadən yaydığı məlumata görə, alyansın bəzi üzv ölkələri ABŞ-la kəşfiyyat məlumatlarının paylaşımını məhdudlaşdırmağa başlayıb.

Nəşr qeyd edir ki, Trampın açıqlamaları NATO daxilində parçalanmaya səbəb olub və bu, Avropa və Amerika tərəfdaşları arasında etimadın zəifləməsinə gətirib çıxarıb. NATO-dakı mənbələrdən biri bildirib ki, yaranmış vəziyyət alyans daxilində gərginliyi artırıb: “Bu, NATO-da avropalı və amerikalı həmkarlar arasında gərginlik və etimadsızlıq yaradır. Amerikalı həmkarlarım yanıma gəlib üzr istəyiblər, onlardan biri hətta ölkəsi adından üzr istədi”.

Britaniya kəşfiyyatındakı mənbə isə ABŞ ilə müttəfiqlər arasında münasibətlərin bu səviyyədə pisləşməsini presedentsiz adlandırıb. O, Trampın addımlarının yaratdığı “fərdi siyasi sarsıntıların” gələcəkdə kəşfiyyat xidmətləri arasında əməkdaşlığa da mənfi təsir göstərə biləcəyi barədə xəbərdarlıq edib.